വിളവെടുപ്പ്

ഇനിയുള്ള നാളുകൾ 

തിരക്കാണെനിക്ക്‌

എന്റെ പ്രണയത്തിൻ 

വിളവെടുപ്പുക്കാലം

ആരുമിങ്ങോട്ടെത്തി 

നോക്കാതിരിക്കുക

ഇവിടെ കൊയ്ത്തുപാട്ടില്ല 

വിഷുപക്ഷിയില്ല

ഉന്നംപിടിച്ചെയ്തു വീഴ്ത്തുന്ന

വേടന്റെ കണ്ണിലെ 

ക്രൂരമാം ലഹരിയിൽ

അറുത്തു വച്ച നാവുകളും

ചൂഴ്നെടുത്ത കണ്ണുകളും

നെടുകെ പിളർന്നൊരു

ഹൃദയവും മാത്രം.

അഖിൽ ജയചന്ദ്രൻ

അപേക്ഷ

അപേക്ഷ

-----------

വിജനമാം വഴിയരികിൽ

അണഞ്ഞു പോയ 

തെരുവ് വിളക്കിന്റെ ചോട്ടിൽ

ആരോ ഉപേക്ഷിച്ചു പോയ 

ഒരു അനാഥഹൃദയം കിടപ്പുണ്ട്

ഞാൻ അതൊന്നെടുത്തു

തുറന്നു നോക്കിയപ്പോൾ

ആ ഹൃദയത്തിന്റെ ഉള്ളറകളിൽ പൊതുമാപ്പ് നൽകുന്നൊരിടം,

അവിടെ ഇതുവരെ 

പരിഗണിക്കാതെ ചിതലരിച്ചു 

തുടങ്ങിയ ഒരു മാപ്പപേക്ഷ..

'എന്നെ മറക്കണം' എന്ന്

ഞാൻ നിന്നെ അവസാനം

കണ്ട നാളിലപേക്ഷിച്ചത്...

അഖിൽ ജയചന്ദ്രൻ